SHIVA SHADAKSHARA STOTRAM consists of a set of very powerful mantras. It is found in the famous Rudra Yamala Tantra Text. It
is believed that anyone who recites or listens to these mantras thrice a day with
faith and devotion would get success in life.
To listen to these mantras, please click on the Shiva image below.
ଘରବାହୁଡ଼ା ପାଇଁ ନିବେଦନ
ଆସହେ ଆସହେ ଭାଇଭଉଣୀଏ
ନ ଛପି ଗହନ ବନେ
ଘୂରିବୁଲୁଛି ସେ କରୋନା ରାକ୍ଷସୀ
ନରସଂହାର ସନ୍ଧାନେ ।
ମାଆ କାନ୍ଦୁଅଛି ବାହୁନି ବାହୁନି
ବାପାଙ୍କୁ ନ ମିଳେ ରାହା
ରାକ୍ଷସୀର ଯେବେ କୁଦୃଷ୍ଟି ପଡ଼ିବ
କିଏ ହବ ବନେ ସାହା ?
ଦଶନ୍ଧି ଦଶନ୍ଧି କେଉଁ ଗୁମ୍ଫା ସନ୍ଧି
ଖାତ କୋରଡ଼ ଆବୋରି
ଶାସକ ବନାମେ ଲୁଚକାଳି ଖେଳ
ତା’ ସଙ୍ଗେ ରକ୍ତର ହୋରି ।
ଗୁଳିଗୋଳା ତଥା ବନ୍ଧୁକର ଖେଳ
ସଭିଁଙ୍କୁ ପଡ଼ୁଛି ଭାରୀ
ଆଜି ଏ ଶିବିର ଢାଳେ
ନେତ୍ରୁ ନୀର
କାଲିକି ଅନ୍ୟର ବାରି ।
ଆମ ଅର୍ଥନୀତି ପାଇଁ ଆଣେ କ୍ଷତି
ଚାଇନାର ଷଡ଼ଯନ୍ତ୍ର
ସୀମାକୁ ଲଂଘିବା ପାଇଁ ତା’ ସେନାକୁ
ଫୁଙ୍କୁଅଛି କେତେ ମନ୍ତ୍ର ।
ଏହି ଚାଇନାର ମାଓ ଆଦର୍ଶରେ
ହୋଇଣ ଅତି ଆକୃଷ୍ଟ
ସମର ମନାସି ହେଲ ବନବାସୀ
ସହି କେତେ ଦୁଃଖକଷ୍ଟ ।
ସେହି ଚାଇନାରୁ ଅଇଲା ରାକ୍ଷସୀ
କଣ୍ଟାକୃତି ରୂପ ଧରି
କେ ବୋଲେ ହୃଦୟ ଭେଦି ସଂହାରଇ
କିଏ ଡାକେ ହରି ହରି ।
ଶୋଚେ କି ରାକ୍ଷସୀ ତୁମ୍ଭେ ବନବାସୀ
ଚାଇନା ଆଦର୍ଶେ ଗଢ଼ା ?
ଯାଚେ ସେ ମରଣ ଶିବିରେ ପସିଣ
ଏହି ଆଦର୍ଶ କି ଲୋଡ଼ା ?
ହିଂସା ପରିହାରୀ ବନ୍ଧୁକ ପାସୋରି
ମୁଖ୍ୟସ୍ରୋତେ ହୁଅ ଛିଡ଼ା
ହସିବ ଭାରତ ହୋଇ କୃତକୃତ୍ୟ
ଚାଇନା ମୁଖେ ଚାପୁଡ଼ା ।
ବନ୍ଧୁକ ମୁନରୁ ଶାନ୍ତିର ପଥ ଯେ
ସହସ୍ର ଗୁଣେ ଉତ୍କର୍ଷ
ଅହିଂସା ଉପାୟେ ମୁକତି ପାଇଲା
ଏଇଯେ ଭାରତ ବର୍ଷ ।
ଲେଉଟା ମୁହୂର୍ତ୍ତ ହେଲା ଉପଗତ
ରାକ୍ଷସୀ ଦେଲା ସଂକେତ
ପ୍ରଶାସନ ଦିଏ ଧରମ ଡାକରା
କରି ପଥ କୁସୁମିତ ।
ଅଧିକାର ପାଇଁ ଲଢ଼େଇ କରିବା
ଥିଲେ ସିନା ପ୍ରାଣବାୟୁ
ବାହୁଡ଼ି ଆସହେ ଭାଇଭଉଣୀଏ
ନ କରି ବିଳମ୍ବ ଆଉ ।
© Dr.
P. K. Mishra – Subarnapur, Odisha –
କରୋନା ଅନୁଭୂତିରୁ ପଦେ
ସେ ଏକ ରାକ୍ଷସୀ ଜୀବାଣୁ, ‘ଉହାନ’
ସହରେ ସୃଷ୍ଟି ତାହାର,
କଣ୍ଟାକୃତି ରୂପେ ହ୍ରୁଦୟକୁ ଭେଦି
କରେ ସେ ନରସଂହାର ।
‘ମୁହିଁ ହତ୍ୟାକାରୀ, ମୁଁ ବିନାଶକାରୀ’,
କୁହେ ସେ ରାକ୍ଷସୀ ରାଣୀ
ରଚାଉଛି ତା’ର ଲୀଳା ଏ ଜଗତେ,
କୋପେ କାହିଁକି କେଜାଣି ।
ପ୍ରଥମ ଲହରେ କେତେ ମୁଣ୍ଡ ଗଲା,
ଦ୍ଵିତୀୟରେ ତହୁଁ ବଳି
ଲହରେ ନଯାଉଁ ଆରେକ ଆସୁଛି,
ଅନ୍ତ ତା’ର ନୋହେ କଳି।
ଗାଁ’ଠୁ ସହର, ଧନୀଠୁ ଗରିବ
ଦୁର୍ବଳୁଁ ସବଳ ଯାଏ
ଶିଶୁଠାରୁ ବୃଦ୍ଧ ପିନ୍ଧନ୍ତି ସମସ୍ତେ
ତୁଣ୍ଡି, ମୁଖପଟି ଭୟେ ।
ତାଲାବନ୍ଦୀ ତଥା ଗୃହବନ୍ଦୀ ଆଉ
ଯେତେକ ପ୍ରତିବନ୍ଧକ,
ଅଜାଡ଼ି ଦେଲେହେଁ ଅମାନିଆଙ୍କର
ତିଳେମାତ୍ର ନାହିଁ ଧକ ।
ସ୍ୱାସ୍ଥ୍ୟକର୍ମୀ ଠାରୁ ଡାକ୍ତରଙ୍କ ଯାଏ
ଯେତେକ କରୋନା ଯୋଦ୍ଧା,
ଲଢ଼ି ଚାଲିଛନ୍ତି ଏ ମହାସମରେ
ତିଳେହେଁ ନକରି ଦ୍ଵିଧା ।
ଧନ୍ୟବାଦ ଆହେ କରୋନା ଯୋଦ୍ଧାଏ
କୋଟି କୋଟି ଦଣ୍ଡବତ
ମାନବର ହିତେ ବଳିଦାନ ତୁମ୍ଭ
ହେଉ ଜଗତେ ବିଦିତ ।
ମୋଦୀ ଜୀ’ ତଥା ନବୀନ ବାବୁ ବା
ଯେତେ ମୁଖ୍ୟମନ୍ତ୍ରୀଗଣ,
ସଭିଙ୍କ ଉଦ୍ୟମ ରାମବାଣ ହେଉ
ହେଉ ରାକ୍ଷସୀ ମରଣ ।
ତ୍ରାହି ଜଗନ୍ନାଥ ତ୍ରାହି ଯୀଶୁଖ୍ରୀଷ୍ଟ
ତ୍ରାହିକର ପ୍ରଭୁ ଅଲି,
ରକ୍ଷାକର ପ୍ରଭୁ ଏ ମହାବିପଦୁଁ
ନହେଉ ଜଗତ ଖାଲି ।
ବିନମ୍ର ବିନତି ଜନତାଙ୍କୁ ଆମ୍ଭ
ସାମାଜିକ ଦୂର ପାଇଁ,
ସଚେତନ ହେଲେ, ପ୍ରଶ୍ରୟ ନଦେଲେ
କରୋନା ଯିବ ପଳାଇ ।
© Dr.
P. K. Mishra – Subarnapur, Odisha – May, 11, 2021
